Kif tagħżel ktieb                          

• Liema kotba jogħġbuk
• Hemm xi awtur li qrajt xi ħaġa tiegħu u għoġbitek
• Hemm xi ktieb li smajt bih u tħajjart taqrah. X’taf dwaru.
• Hemm xi sensiela li qalulek biha, rajtha xi mkien u tħajjart taqra xi ħaġa minnha
• X’jinteressak l-aktar.
• X’inhuma l-passatempi tiegħek jew suġġetti favoriti jew għal qalbek.
• Fittex fid-dar għal xi kotba li jistgħu jinteressawk.
• Fittex fil-librerija tal-iskola, tar-raħal (jekk hemm) jew fir-reġjun jew fil-librerija pubblika.
• Ħu l-ħin li għandek bżonn. Mur ippreparat u mhux b’ħafna għaġla. Qisek sejjer tesplora.
• Fittex fuq l-internet skont is-suġġett, l-awtur jew l-età.
• Staqsi lil xi ħadd li jifhem u li tista’ tafdah (għalliema eċċ) biex jirrikkmanda xi ktieb li jgħodd għalik.
• Tajjeb li taqra xi riċensjonijiet fil-gazzetti jew fuq l-internet dwar xi kotba li jkunu ħarġu.
• Żur fieri ta’ kotba u staqsi fejn tixtieq tkun taf.
• Ikkuntattja xi awturi u staqsiehom dwar il-kotba tagħhom.
• Flimkien ma’ sħabek (skola, fejn toqgħod,) waqqfu Klabb tal-Kotba u ddiskutu xi kotba li tkunu qrajtu.
• Ikkuntattja lill-pubblikaturi biex jibagħtulek xi newsletter tagħhom.
• Meta tkun qed tagħżel xi ktieb minn fuq l-ixkafef, tiddejjaqx tibdel wara li tkun għażilt u sibt xi ħaġa aħjar. Sib il-ħin biex toqgħod bilqiegħda, taqra l-blurb u xi biċċa mill-ktieb.
• Il-qoxra wkoll għandha ċerta importanza.
• Żomm lista tal-kotba li taqra u xi nota qasira dwarhom. Dan jgħinek biex tagħmel aktar għażliet u tgħin lil ħaddieħor.
• Taqrax ktieb għax qed jaqrah kulħadd. Kultant il-pubbliċità ma tagħtix stampa reali tal-ktieb. Irridu noqogħdu ftit attenti li ma nkunux influwenzati żżejjed minn reklami u gimmicks oħrajn.
• Ibda b’kotba li fihom ftit paġni u dejjem żid. Taqtax qalbek minn ktieb b’ħafna paġni. Aqrah ftit ftit qisek qed taqra storja qasira kull darba.
• Tajjeb li tkun taf kemm hemm xogħol biex isir ktieb u b’hekk tapprezzah aktar.
• Ibni librerija personali matul is-snin.
• Agħżel ktieb bħala rigal.
•  
•  

Fil-Librerija tal-Universitá, hemm wirja dwar ix-xogħlijiet tiegħi u dawk ta' Trevor Zahra, Rita Saliba u Leanne Ellul. L-idea wara din il-wirja kienet li nlaqqa' flimkien awturi minn ġenerazzjonijiet differenti u hekk wieħed jista' jara stili differenti, kemm fil-kitba u kemm fid-disinji. 

Nixtieq nirringrazzja lill-amministrazzjoni tal-Librerija li tawna kull għajnuna possibbli u b'mod speċjali lil Mary Samut Tagliaferro, Joanne Felice u Stefanja Cassar u impjegat ieħor li jiddispjaċini ma nafx min kien. 

Nittama li din l-inizzjattiva tiegħi tkompli u akar awturi jitħajru jesebixxu flimkien ix-xogħlijiet tagħhom. Jekk xi ħadd ikun interessat jista' jikkuntattjani fuq charles.casha@gmail.com u nagħtih l-informazzjoni. Min ikun irid jesebixxi ikun irid jibbukkja slots biex min jieħu ħsieb il-wirjiet ikun jista' jqassam il-ġranet. 

Il-ġeneru tal-Fantasija

Irid  ikollok idea ċara meta tiġi biex tikteb f’dan il-ġeneru u din trid tkun

1.  tista’ tinħadem 

2. Mhix stupida (tagħmel sens) u

3. interessanti.

Minħabba problemi li jinħolqu fil-produzzjoni, tagħmel differenza jekk hux se tikteb ktieb jew dramm.

Il-kittieb irid iħares ukoll lejn dawn l-aspedtti:

1.      Id-dinja li se joħloq ( realta’ u fantasija jew fantasija biss )

2.      Il-Karattri ( fantasija jew imħalltin )

3.      Rabta bejn il-karattri jekk ikun  mħalltin.

Il-fantasija hija ġeneru li tuża l-maġika u dak li huwa sopranaturali. Ħafna drabi l-ġrajja  tiżvolġi f’postijiet mistħajla jew fuq pjaneti fejn il-maġika hija xi ħaġa komuni. Mhix science fiction  għax iżżomm ‘l bogħod minn temi li għandhom  x’jaqsmu max-xjenza. Ħafna drabi hija ispirata mill-Mitoloġija u l-folklor. Dak li mhux possibbli jsir f’dinja reali jista’ jsir f’dinja maġika maħluqa mill-awtur.

Id-dinja ta’ fantasija li joħloq l-awtur trid tkun  ċara f’moħħu u kultant ikun hemm  ukoll mappa, ismijiet ta’ postijiet, toroq eċċ. Il-kittieb iħossu qed jikteb fuq xi ħaġa li jaf u l-qarrej jidħol fl-ispirtu tal-ġrajja għax dik  id-dinja  ssir dinja li qed jiskopri ftit ftit fil-ktieb.

Fil-kitba moderna tal-fantasija, xi awturi qed imorru ‘l bogħod mill-Mitoloġija u l-folklor u kultant jidħlu fis-science fiction u l-biża’.